أسعدكم الله
وجدت قصيدة للشاعر عثمان الثبيتي
على هذا الرابط
http://www.alqwafel.com/vb/showthread.php?t=18066
فحبيت أستفز شاعريته بهذه الأبيات
سموها مجاراة او استفزاز على كيفكم
المهم اليكم الأبيـــــــــــــــــــــات
يامرسل عتابك على عثمان=طيرت نومه واتلف أعصابه
طيرت نوم الشاعر النعسان=الليل كله يفتل أشنابه
قام يتهيض يبدع القيفان=مافيه بحر إلا تغنا به
وده يجيك ودونك البيبان=والبيت مدخاله مع أبوابه
يخاف هرجة لايم وفتان=والناس بواقه وكذابه
يحسب حساب الزود والنقصان=وليا غلبه الحب هذرابه
الفارس اللي ينطح الفرسان=ماصاب عنتر بالهوى صابه
يالايم لعثمان بالبهتان=عثمان ما يبخل على أصحابه
الحر وقت النايبات يبان=ياما شلع صيده بمخلابه
مير الهوى نوعٍ(ن)من الإدمان=مجنون ليلى شقق ثيابه
مثل الدجيما صايبه بجنان=حتى قضا فوقه ولا عابه
سوالفه تحكي بها الركبان=والود ماينلام طلابه
ياشاعرٍ(ن)جريت للألحان=السهم لا تخطي لمضرابه
تعرف هدفك وحكم النيشان=وليا نويت الغزو لا تهابه
لا تستمع لفلان وإلا فلان=الناس ياعثمان نصابه
سوق الركايب عوذ الشيطان=وإنطح هدفك ولا توانا به
قالوه قبلي الكريم معان=والخبل مقشاعه لمحطابه
قرمان ياقرمان ياقرمان=الطنب لا تقلع لمنسابه
خل الشكاوي سم بالرحمن=الرمش ريح يابس أهدابه
عثمان ياعثمان ياعثمان=طير لنومه اتلف أعصابه