طاب وقتكم بالخير والمسرات

الله على ما فات وأمالنا فوق
قدام تصغر في عيون المكابر

واليوم صار الصدر ضايق ومطبوق
طول السفر يهدم لعزم المسافر

تركض بنا الأيام والدم محروق
من لهفة ٍ مابين ملهم وشاعر

على قطار الشوق يا جمرة الشوق
نهدي مشاعر في قطار المشاعر

عل الهدايا تنعش القلب ويفوق
يذكر لمهديها قبل لا يغادر

وإن كان ما هزه من الشعر طاروق
عز الله إنه مثل ناس المقابر

هذا عتاب اللي من البعد مخنوق
أعوام فوق البعد والوجد صابر

نعم عتاب أحباب ماهو بمسبوق
ممزوج من شعر ومشاعر لجابر

للي لهم بالقلب سجات وحقوق
من سالف الأزمان والقلب عامر

لكن زمان ٍ فات ماهو بملحوق
ما باقي إلا ذكريات ومخاطر

ترعد ببيت الروح وأشعاره بروق
والعين فيها من هوى النفس ماطر

راح الزمان وحلم الأيام مسروق
جفت سجلات العمر والمحابر

ليت الزمان يعود ياكامل ياذوق
نرجع أكابر والأماني أكابر

الله على ما فات وأمالنا فوق
قدام تصغر في عيون المكابر