أسعدكم الله
كالعادة الأبيات بدون مقدمات
ياليل بلغها سلام ومراسيل=قل للحبيبة عن هموم اسهرتني
ياليل خبرها عن الحال يا ليل=النوم طاير والهجوس ذبحتني
ودي بها والبعد قاهر ويا ويل=أشواق قلبي للغلا جننتني
وأنا أشهد إن الشوق ذيب الرياجيل=عطشان أخايل مزنةٍ(ن)ما سقتني
عنيت روحي بالشعر والمواويل=غنيتها يا ليل ما ريحتني
ما عاد تجدي بالجروح التعاليل=احلام ليلي بالغلا غربلتني
طول السهر خلا عيوني فناجيل=أسامر أحلام الهوى واسقمتني
تمضي ليال وطمعتي بالمقابيل=الوضع واحد والطيوف فتنتني
أركض وراها وأشتكي من غرابيل=لا هي بتبعدني ولا قربتني
الحظ مايل ما نفع فيه تعديل=احلى الليالي روحت وتركتني
كل ما بغيت أعدله زاد بالميل=لين الضلوع من الشقا عورتني
وعروق قلبي بالمحبة محاميل=مير الظروف القاسية جنبتني
عن شوفتك يابو عيونٍ(ن)مظايل=عهدي بها يوم إنهن سحرتني
من يومها والحيل مهدود بلحيل=من كثر ما عين السهر سامرتني
كل ليلةٍ(ن)أحط بالحلم وأشيل=تعبت حلومي والحلوم أتعبتني
تركض بفكري لين سوت مداهيل=وليا غفيت بمرقدي داهمتني
حاولت فيها تترك البال وتحيل=لكنها عيت ولا طاوعتني
تدهف بعقلي مثل ما يدهف السيل=غرقت بحظي بعد ما غرقتني
الليل كله نازن الشوق ونكيل=نار الغرام اللي بها حرقتني
أون وعيوني تعاني بهاذيل=عين السهر من حر ما بي بكتني
أسقت من الغال عطاش المناديل=لين ارتوت من عبرةٍ(ن)غافلتني
هلت على الوجنة سواة الهماليل=من لاهبٍ(ن)بالجوف ناره كوتني
ياليل بلغها سلام ومراسيل=قل للحبيبة عن هموم اسهرتني