نويت أكتب على وجه الزمان من الحروف سطور=تحير فكر قاريها وتدمي قلب سامعها
ابكتبها بوزن الشعر حتى تتعب المنثور=وتتعب كل من وده يدقق في مراجعها
بدقق في معانيها ولا ودي يبان قصور=بنات أفكاري اللي دوم بالأيام رافعها
أغوص بحور بعد بحور وأصنع للقصيد بحور=تسلي خاطري والا العرب ماني بنافعها
بدون فيه تاريخ العمر قبل الزمان يدور=شواهد للسنين القادمة قبل نوادعها
قصائد والقصائد مثل ما نسمع لحن وشعور=ليا زانت معانيها تروى من منابعها
مقصدي مكسب(ن)أكسبه والااصير به مشهور=لكن الشعر بوح النفس ويبين مواجعها
ولاني منتظر من واحد(ن)يقول لي مشكور=بيوت الشعر حسب الفكر حاكمها وصانعها
وأنا ما همني يرضى علي ويزعل الجمهور=ما دام إن القوافي والمعاني صرت جامعها
أنا سيد قصيدي لا عشقته بالعقل معذور=خبير(ن)في مساراته عريف(ن)في تقاطعها