لا تنشدوني من أين وإلا من أي ات=ما ينشــد إلا من النـاس مجهــول
أنـا ثبيتـي من رفيعين الأبيــات=راع النسب والمجد بالعرض والطول
غصبٍ(ن)عن الحساد وغصبٍ(ن)لشمات=هـذا كـلام الجــد ثابــت ومعقـول
إلــي على التـاريخ كثير بصمات=فاعـل ولاني يا عـرب كنت مفعول
إلي مع الأيــام صــولة وجـــولات=ما يجهـل العتبـان يا كود مهبول
ماضي وحاضر وباقي العز جايات=الأصل ثابت وباقي الناس مشمول
ابن هليل يعرفــه كل من مـــات=ويعرفه من هو حي يا كود مخبول
إلــه مع التــاريخ يا كـم وقفــات=لن صعبت الإريا لقا لصعبها حلول
أصلي وأنـا فرعـه والأفعـال ثبـات=ومن كان جده نجـم ما هو بمأكـول
ما ني بحاجــة للصحـف والدعايات=هذا طريق اللي عن الناس معزول
ولاني بحاجــة للعطــر والمرايـــات=طيبـي مكفيني وباقي له فضــول
مانـي بـلا خبـل ولانـي بهتــات=ولاني على الأعناق في يوم محمول
الضيف ما نمنعـه في كل الأوقـات=بيت الكرم ما يوم شـافوه مقفول
هذا الفخـر إلي مع الطيب سجـات=اللــه كملنــا بخيــرات وعقــــول
قمة معزتنا لنا الفخــر بإثبــات=خــوال للي للمخاليـــق مرســول
معروف منزالـه قرايـا الذويبات=ولا زال منزالـه من ثبيت منـزول
هذا لوحده يكفي ثبيت بالــذات=باقي مدى الأزمان تـاج على طـول
باقي الفعائل كان راحت ولن جات=تحيــا مع الأيــام وتعيــش وتـزول
رضيعنـا ليا رضع خمس رضعـات=يضرب بسيف ورمح ويعَسف خيول
هذا جــواب لكل جاهــل وهتــات=للي يحسب البُـر مصنوع من فـول