يوم الخميس العصر فاحت الازهار = فاحت زهور الصدر بقدوم منصور
استبشرت من بارقه بنت الافكار = نمت ورود الحب بفواد ممطور
الضيف إله عند المعازيب مقدار = شوفتك ياضيف الغلا تثلج صدور
اهلاً هلا أعداد برَاق الامطار = و اعداد نبت الأرض من ورد وزهور
ياضيفنا تفداك تفداك الاعمار = غالي وسميتك على بوي منصور
أبغاك مثله صقر يانسل الاحرار = أبغاك تجبر عظم من كان مكسور
أبغاك سيف العدل لو صار ماصار = لا تأخذ فالحق لومه ومعذور
أوصيك بالاثنين والاخت والجار = خلك صدوق النطق والكذب مقبور
أوصيك بالخمسه وسجدات الاسحار = أحرص عليها يغدي القلب مسرور
أوصيك بالنور الذي فوق الانوار = العلم نوره فوق ما ياصله نور
الصدر خله بيت لرفوف الاسرار = وأحذر يكون السر باين ومنثور
الطيب والمعروف تبني لك الدار = مدام أساس الدار من طيب معمور
الكلمه اللي طيبه طيب الاشجار = تؤتي ثمرها يالسنافي على الفور
الكلمه اللي مالها ظل وثمار = ما من قرار الها ولا حولها صور
أحذر تطيع النفس في درب الاشرار = الزرع ما ينمو بلا ساق وجذور
أحذر ترى لشر بارق وتيار = ياما جذب فهود ونمور وصقور
أحذر من الانذال لا تشعل النار = بين القرابه و أحذر تكون مغرور
لا تغرقك أمواج و سيول دينار = المال زينه والغنى كنز مستور
جل الوصايا صغتها عبر الاشعار = تنصا الذي عادل وناصر ومنصور
هذا وصلى الله على خير الابرار = شفيعنا اللي مرسله مرسي الطور