مــافــيـــه داعـــي
مافيه داعي تعني النفس من شاني = مدام بيت الوفاء والحـب هـديتـه
فـرشـت إلك قلبي بلؤلو ومرجاني = لـكـن بـعـتـه وطنشـته وسميـتـه
سـمـيـتـنـي بسم وقف دم شرياني = ما حن قلبك على قلبي ولا شفيـتـه
أنكرت طـيـبـي ومعروفي وعنواني = نـسـيـت كـل الـذي لجلك مديـتـه
لكـن أخـذ كلمةٍ من عظمة الساني = إبعد وفارق مدام الغدر سـويـتـه
مـامـرني طيفك اليومه ولا جـاني = وليا لفاني بسيـف العـز رديـتـه
عـزيـز نـفـسٍ ويعجـز من تحداني = صابر على الضيم لـو أحيان مليته
لا خـيـر في شجـرةٍ ذبله الأغصاني = وش لـون تحـمـيـك من حـرٍ قاسيته
العيـش في ديـرة الأغراب وحداني = أخـيـر من ديرةٍ حـيـه وهـي ميته
الغربة أحيان مـرة فيها أحزاني = لكـن أرحـم مـن الغـدار في بيته
العام أنته حياتي ونور الأعياني = والـيـوم انـا أقول خلاني وخليته
مافيه داعـي ترى تبكي على شاني = مـدام بيت الوفاء والحـب هـديته