أسعد الله أوقاتكم
الكل يرى ويسمع ما يحصل بالشام بشام الخلافة الأولى
شام العرب من المحيط الى الخليج
يقتل الشيوخ والنساء والأطفال
تهدم المساجد والمساكن
من أجل زمرة فاسدة هدفها السلطان
وبشر الصابرين (إن النصر لقريب)
نحن معكم يا لإخواننا بشامنا
وهذه أبيات على عجل علها تعبر عن الحد الأدنى من مشاعرنا تجاه إخواننا
يا شام صبرك غمةٍ(ن)يوم تنزاح=واللي يشب النار مثواه بالنار
الروس بالشيشان ما نالو أرباح=وشلون يلقوا ربح من وجه بشار
ما نافعه فيتو من الروس وسلاح=دام الشعب كله على ساجنه ثار
ما يعتبر بشار من سابقٍ(ن)طاح=وينه معمر كان واليوم تذكار؟!!!
لكن عماه الغي مايوحي صياح=يكذب على نفسه بتلفيق الأخبار
ما عاد به حرمة بشرعه للأرواح=يقتل شيوخ وخدجٍ(ن)شوف الأنظار
هذا هو السفاح لين قيل سفاح=لا والله إلا عار وأفعاله العار
هد المساجد فوق طلاب الإفلاح=ويقول أنا حامي حمى حوزة الدار
وينه عن الجولان كساب الأمداح=خمسين عام ويمها الوجه ماإندار
عاند وكابر وأخرتها لمرواح=للموت وإلا مثل حسني بخفار
دام الشيوخ اللي تنادي للإصلاح=عاندتها أبشر بخيبة ومخسار
صقر العروبة من يعانده يا صاح=ما والله عيونه يشوفن الأنوار
يا ما نصحك ولا تسمعت نصاح=وأرسل لك الإنذار من عقبه إنذار
الحر يعرف بارق السيل لا لاح=لكن حسافة ما أنت من جنس الأحرار
لو كنت منهم كان للعلم لماح=ما تنتظر حتى تظلي كما الفأر
اليوم جاك الموت سمٍ(ن)بتفاح=صكوا عليك الباب من دونك أسوار
كل قفل له عند المناعير مفتاح=ما عاد لك يم المفاليح مسيار
ولى زمانٍ(ن)كنت بالشام مرتاح=القبر يحفر جاي لك قصف الأعمار
لا يغرك إسمك يالأسد بعد ما راح=ماأنته بأسد إلا ثعيلب ومكار
إصبر على طعن الشباري والأرماح=حتى تنخ وتعترف بالذي صار
الحق غالب والمظالم بتنباح=والعاقبة معروف من حظ الأبرار
الشام شام العُرب ماهو بمسباح=تومي بها ما بين شاري وسمسار
ماهو بسهل تروح في فم تمساح=الشعب صاحي والعرب خيًه البار
بشار جاك العلم واضح بالألواح=إرحل وخل الشام تنعم بالإعمار
أظن هذا القول ما يوجب إيضاح=حياة وإلا موت بشار تختار؟!!!