أسعدكم الله دنيا وأخرة
ما كل ما قيل صار وما كل ما صار يقال
اليكم ما جادت به الهواجيس عله يروق لكم
الأبيات
ولا ياحمامٍ(ن)هيض القلب بلحونه=على شرفة الشباك غنى وبكاني
سمعته يغني والمخاليق يوحونه=وهيج مشاعر ذكرتني بخلاني
ذكرت الوليف اللي حدا البعد من دونه=وهلت مراويح السحايب من أعياني
تقافا غشين الدمع ماهو على هونه=تحدر سواة السيل من فوق الأوجاني
من أسباب خلٍ(ن)فاتن الروح بزيونه=جمع فيه ربي زين ماهو بأحد ثاني
مقادير ساقتني وهبلني بلونه=جماله طبيعي والحسن فيه رباني
قوامه وصوته والسحر داعج عيونه=وخدٍ(ن)يشابه نوض برقٍ(ن)بالأمزاني
وضافي جديلٍ(ن)منسدل كاسي متونه=تولعت به والحب والشوق عناني
قبل شوفته عاقل وذا الوقت مجنونه=عسى من يلوم يجيه ياناس ما جاني
غيابه معقب جرح بالقلب ياعونه=وعقب مواجع للقوافي والألحاني
بكيته وشعري والطواريق يبكونه=تسليت به لكن ما طرق سلاني
أحبه وحرفي والمحاريف يبغونه=سكن بيت روحي والهوى فيه وداني
هواجيس فكري والمشاعر يودونه=تمكن غرامه لين عقب لي جناني
أغني مع الورقا طواريق لفتونه=على الله يزين الحال وتزين الأزماني
يجيني ولا يسمع عواذل يلومونه=ولن حالت الأقدار ما حال نساني
بسطر قصائد شاعرٍ(ن)راح مظنونه=تغني بها الركبان من قاصي وداني
شواهد على التاريخ والناس يقرونه=يقولون قال فلان لا صرت أنا فاني
ولا ياحمامٍ(ن)هيض القلب بلحونه=على شرفة الشباك غنى وبكاني
التميز
الإهداءات
هلت مراويح السحايب من أعياني !!!
رد: هلت مراويح السحايب من أعياني !!!
