السلام عليكم ورحمة الله وبركاته
كالعادة الأبيات بدون مقدمات
والله إني ما نسيت الساعة اللي جمعتنا=يوم دقات القلوب تسابق عناق الأيادي
كيف ينسى قلبي الملهوف لحظة ونستنا=لحظةٍ فيها نسينا همنا والحظ جادي
لا تخافي ذكرياتك والغلا ما فارقتنا=لا تحسبين التلاقي ياغلا موضوع عادي
دامت الأنفاس فينا لو نسينا ذكرتنا=فرحنا عمره قصير وهمنا بلحيل زادي
آه من ضحكة زماني فرحتنا وغدرتنا=حيدتكم في بلاد وحيدتني في بلادي
ضحكت الدنيا لنا لحظه وعادت عاقبتنا=ما تحقق يا حياتي لا هواك ولا مرادي
إجتمعنا وإفترقنا والليالي بعدتنا=عادت هموم الزمن والشوق للملتاع عادي
ما بقا غير التأوه نار بعدك أحرقتنا=كن في جوفي لهيبٍ(ن)ينشوي فيه الفؤادي
تنزف جروح القلوب وبالليالي سهرتنا=ما هنانا لا طعام ولا شراب ولا رقادي
نزرع الأحلام في صحرا همومٍ(ن)سهدتنا=ما جنينا غير هم وغم وأوجاع وسهادي
حظنا العاثر خدعنا والليالي عاندتنا=كل ما قلنا تزين تزيد قسوات وعنادي
يشهد الله ما نسيت الساعة اللي جمعتنا=يوم دقات القلوب تسابق عناق الأيادي