أسعد الله أوقاتكم
كل مساء وصباح أنتم على موعد مع تخاريفي
اليكم ما جادت به الليلة
الأبيات
فصول العمر منها فصل ياشينه ليا من زار=يهد اللي بناه الفكر طول العمر ويعيقه
رمى لي ضيقته وارتاح مايدري بماهو صار=بقلب العاشق الولهان وش سوت به الضيقه
من أسبابه تكدر خاطري والنوم عني طار=وهمي زاد فوقه هم قلبي كيف بيطيقه
ألا ياليل أنا وإياك وهموم الزمن سمار=بعد حلمٍ(ن)حلمته معك صعب اليوم تحقيقه
حلوم العمر ياليل السهر طارت سواة بخار=تطاير بالفضا منهو يرده عقب تحليقه
ياكبر أحلامنا ياليل ويدين الفعول قصار=طردنا حلمنا لين الزمن نشف لنا ريقه
ركضنا خلف مقرود السراب وعميت الأبصار=غدينا في مهب الريح ريشٍ(ن)هان تفريقه
بعد دار الزمن والوقت قالوا بالمثل دوار=بلينا مثل ثوبٍ(ن)باليٍ(ن)ياسرع تمزيقه
حبائبنا تناقص عدهم من عقب كان كثار=وأنا باب الوصل ما هان لي أرضى بتغليقه
من أول كل يوم نشوفهم مايهجرون الدار=وذا الحينه تمر أيام مابه مقبل نويقه
ولن جئينا نعاتبهم لقينا طارف الأعذار=ومعظمها على شان المجامل درب زحليقه
كذا وإلا كذا يا قاطعين الوصل والمسيار=ترى مابه مشاريهٍ(ن)على من قل تصديقه
ترى عمر البنادم واحدٍ(ن)ماله سواه أعمار=وأنا ماني بمن يهدي لغلطاته وتزهيقه
مثل ماني جبل ماتهزه الأرياح والإعصار=ولاني من يدور حجةٍ(ن)لو كان تلفيقه
بوجه الريح صامد ماعليَّه من هبوب غبار=تمر العاصفة والرمش يحمى العين تطريقه
يافصل العمر ياللي زرتني مع باقي الزوار=ترى ماهو بنيته بالفكر ما اسمح لك تعيقه