أسعدكم الله
اليكم الأبيات بدون مقدمات علها تروق لكم
يا هاجسي طال ليلي والقمر غايب=والعين ما تبصر الخطوة مع المسرا
من عقب وقت الشباب أمسيت به شايب=يا ليل من وين أجيب لحالتي صبرا
أبطى طلوع الفجر يا قلبي الذايب=لا شمس بانت ولا شمعة ولا قمرا
وش غير الحظ صاير منثبر خايب=كل ما نهض طاح من عثرٍ(ن)على عثرا
النفس ما عذرت من مخطي وصايب=والفكر تنزف جروحه دم ما تبرا
لا من ذكرت لزمانٍ(ن)كان لي طايب=في قرب من قربها يا هاجسي يشرا
حال الزمن دونها ما عاد له نايب=أقفى مع الريح مدري حاقته غبرا
ونيت ونة كسيرٍ(ن)والعظم عايب=ماله علاجٍ(ن)يكود يشال بالبترا
عن حبها مستحيل يقال لي تايب=لو بعدها فوق قلبي يشبه الجمرا
ما عشت ماني بتاركها ولا سايب=حب الغلا والوفا مكتوب لي قدرا
والله ما أنسى لنظرة رمشه الرايب=وإلا لبسمات ثغر وشفةٍ(ن)حمرا
باقي وصوف الغلا عن ذكرها هايب=لكنها فتنةٍ(ن)تغلب على السحرا
ياليل عجل ببدري رجعه آيب=قدام تفنى الليال ويذهب العُمرا
يا هاجسي طال ليلي والقمر غايب=والعين ما تبصر الخطوة مع المسرا