أسعدكم الله
الأبيات مثل ما جات بدون مقدمات
اهديها لكم
لو المسافة بيننا فركة كراع=هانت علينا باقيات المخاطر
وليت المسافة بيننا مدة ذراع=ما كان سجينا جديد المواتر
ولا كان حسينا بلوعات الاوجاع=ولا كان ضيقنا عزيز الخواطر
مير المسافة بيننا مبعد القاع=اللي يكَسَّر في عزوم المسافر
مهما تحدينا وقلنا ترى سباع=البُعد كايد والعطش للحناجر
لو القدم للي يبي خافقي طاع=شيبت من سجي رموش النواظر
كله على شأن الغلا حلو الأطباع=اللي لقبلي مثل روحي يشاطر
أهوى لذاته وأعشق لكل الأوضاع=حلو المحيا والأدب والمشاعر
أحلم بشوفه صيف وأحلمه مرباع=في روضته والشوق للقلب ماطر
لو الزمن ضيق لنا صدورٍ(ن)وساع=ماني بناسي للغلا دوم فاكر
أحلامنا لوهي كبيرة بلا نزاع =تصبر على الحرمان لو كان قاهر
عن شوفتك ياللي لك القلب مولاع=ما باقي إلا طيف ناوي يغادر
رفع على وجه الزمن صاري شراع=وأنا همومي حملت للبواخر
هم الهوى والهجر ماهو بينباع=منهو يتاجر بالهوى حتم خاسر
لا صار من يهواه من دونه اشساع=والحظ عاند والقطيعة خناجر
يقيني إنه في صحار الهوى ضاع=بُعد المسافة للمشاعر مقابر
وختامها يا حظ بالصبر تنصاع=الله عوين اللي على البُعد صابر
لو المسافة بيننا فركة كراع=هانت علينا باقيات المخاطر