الله يصبح حبيبي بالرضا والحبور=يا شرقة الصبح يا نور الخفوق وضياه
أشعلت لك جمر قلبي ولعي للبخور=العود الأزرق بجمر الشوق يطلق شذاه
يا شمعة الغيد مدري يا زعيمة لحور=يا بسمة العمر يا بهجة زمان الحياه
منك الهنا والغنا والعافية والسرور=يا منتهى غاية المشتاق وأخر منـاه
القلب يقتات من حبك جميل الشعور=يا نبض قلبي يا روحي ياكنوز الغناه
هنا مرابعك خلف العوج باني قصور=تربعي في سويدا القلب وأخذي هواه
حولك عصافير شوق بالمحاني طيور=وأنهار بستان قصرك حالية من حلاه
يا سيدة قلب جابر في جميع العصور=يا مالكة للخفوق وعارفة مشتهاه
أنتِ(ي)غرام المولع في جميع الدهور=ما فيه غيرك من التلعات طالب رضاه
والله ما أنسى غرامك في غياب وحضور=لين النفس ينقطع والروح تذهب معاه
حبك لقلبي حياة وريحتك لي عطور=يا مصدر الهام قلبي بالهنا والشكاه
يانور عيني حضورك نور من غير نور=العين والقلب والأشواق تتبع سناه
يكفيني أشوف نورك لو لحظة مرور=يا بدر دنياي خلي للبدر في سماه
أجمل قصيدي تغنا بك بليا قصور=وإن جاء قصورٍ(ن)بشعري حطمي مستواه
وتربعي فوق عرش القلب ست الغرور=يا مشغلة خافقي بالصبح وأحلا مساه
الله يمسي حبيبي بالرضا والحبور=يا شرقة النور يا نور الخفوق وضياه