سلام الله سلام نبتديبه يبلغ المقصود=واسوقه للرجال اللي لهم تاريخ وقياده
بعد جينا لحلة كاسبين الطيب واهل الجود= تباشر يالجهاز وكل رجل(ن) يمسك شداده

هلا يا مرحبا باللي لفا بالموعد الموعود = ارحب بالرفيق اللي حضر في يوم ميعاده
نباناخذ علومك يا صحيبي وابذل المجهود =وكلٍ(ن) نيرته يا مــخلف الهقــوات بزنــاده

يدو م الك البقا من شاعر(ن) لازم وصاة العود= وان افرح يوم احيت الجاهز اللي دن رعاده
بعد حنا وردنا يالعتيبي فوق عد ورود= اعرف انك من اهل الطيب مايبغا لك زياده

وانا ما اقول للي مثل مخلف غير نعم و زود = تونسنا طواريقه ونفرح دوم لانشاده
وردنا العد يالصاحب وربي والعباد شهود = وانا وانته من اهل العرف يوم النار وقاده

الا ياقايد الافواج ميز بيضها والسود= لكن العلم الابيض ياسقا للي وصل ماده
زعيم القافله يرحم عظامه في قبر ملحود= بعد جاته سهوم الموت ياابو زيد منقاده

اشوفلّي بروق تلوح واسمع فالديار رعود = وقالوا لي سحابة صيف سيقت مثل جلاده
زعيم القافلة كفى وطـــوّع فالزمان جــنود = و منهم من عيال سليم مطروحة ومنصاده

نسيت الماقف اللي فيه ثار الملح والبارود= تحت ضو النهار وكل علم(ن) عندي اشهاده
عقيدي من سليم افطن لهذا العلم ياداوود= عقيدك مستعار وكل حبل(ن) نعرف اعقادهها

الا يا وجد حالي يا زمانٍ فيه قدح زنود = تحت ضو القمر نسري ونصبح فالبلد ساده
عقيدك يا وسيع المعرفه يرجف من العبرود = عقيدي راعي الوقفه وانا واحد من احفاده

رمابك حظك الاقشر بحلق السبع يامقرود= لكنك لاتصلي لك صلاه بدون سجاده
اقول الشاكله قسمي وقسمك شوشة العجرود= ومن ساق الجمل ملزوم ياقيود بقياده

تركّد يا عميلي لا تعدى حدك المحدود = وراع المزرعه ما يزرع الا داخل بلاده
ترانا للثلاث البيض يومن البروق تقود = توقـــع لا تزودها ترى للـــعلم نقاده

دخيلك يالعتيبي لاتقرب سكة المنقود= وانا مااقبل يجي ناقص ولا اقبل ياجي زياده
تبعتك نصف ساعه وان معندك حصيل وفود= لكن السبع ولد السبع يعرف وين مرقاده