ياسلام الله سلام يسد منهو جوعه= طاوي(ن) بطنه وطول ماهواه الزادي
ودي بشاعر يصوع القاف وانا اصوعه= كل مارده عميلي جيتله من غادي

مرحبا ترحيبة(ن) فالرايه المرفوعه=رايه اهل الطيب واهل المسك واهل الكادي
جاك شاعر وانت تمشي ياسعد في طوعه=ولن نويتك ياعميلي ماتعدى المادي

البقا ياشاعر(ن) جنسه وشكله روعه= ادعي الله يحفظه والله كريم وهادي
المصيبه لن رغى خصمي وحط وقوعه= واعلنوا به فالصحافه واعلنوا فالرادي

وأنت جنسك يالعتيبي نادر(ن) من نوعه=اطلع مع الريع وأحذر لاتحدر الوادي
أنت نمر(ن) من نمور انيابها مقلوعه=والله اني للعداء سم(ن) على الاكبادي

رد عنا يارفيقي داخن القربوعه= اعمت عيون العرب بالداخن اللي زادي
انت ولبه جرت عواها عصر مريوعه= صوتها مزعج لك الله وايقظ الرقادي

من دواخنها ترى نص العرب مصروعه=لاتشمشمها عساها صبح بالسدادي
من يرد الذيب ولبه صدق يلحس كوعه=ياجمل ياللي مع الوادي بدون شدادي