للتواصل والمواصل بدون فاصل ولا مفاصل
اليكم الأبيــــــــــــــــــات
وصاتي يامسافر لا وصلت لوجهتك وارتحت=أكون أول من تخبره وأخر واحدٍ(ن)تنساه
تراني من سمعت بسفرتك مع هاجسي سرحت=أخاف من السفر لا يتعبك ويلاه ألا ويلاه
ألا ياليتني معك خويك جيت وإلا رحت=رفيق مرافقٍ(ن)صاحب صديق وكل ما تبغاه
مثل قلبك ودقاته وأسبح كل ما سبحت=أضخ الدم بعروقك وأحس بفرحتك وال آه
ملازم لك مثل ظلك يلوح كل مالوحت=وأكون أقرب من الأنفاس وأشهى كل ما تهواه
أمانه يا مناة الروح طمني ليا صبحت=وتخبرني مسا باللي نهارك معك قد سواه
تراني لو بعيد قريبٍ(ن)وأحس بك لن بحت=بسرك للضمير اللي عسى نبض القلوب فداه
أنا روحي معك لو الجسد مبعد فما بارحت=مكانٍ(ن)ضمنا في عالم الأحلام يامحلاه
أشوفك بارق لشعري ليا من في خيالي لحت=سحائب فكري بشعري ينزل من غزيره ماه
يسقي لك صحاري بالحشا ياما لها جرحت=وتثمر لك غصونٍ(ن)يانعه بالجوف من سقياه
نهايتها ترفق بي تراني في غرامك طحت=وطامع بالليال تزين والقا للغرام دواه
لكن الحظ حادي والزمن مهما صبرت ونحت=لغير اللي كتب باللوح لا يمكن ابد نلقاه
وصاتي يامسافر لا وصلت لوجهتك وارتحت=ماكون أخر من تخبره وأول واحدٍ(ن)تنساه