أسعد الله أوقاتكم
الأبيات تعبر عن مضمونها
تقول:الكادي اسمع ودي أسافر بغير جو=أحس إني من هموم الزمن بلحيل مخنوقه
بسافر كم يوم دبي وأرجع ياغرامي تو=وبعدينه مطاليبك على ماقيل ملحوقه
تقوله من برود أعصابها والنار بي تشو=معاليق الحشا أحسها بالنار محروقه
تبي ترتاح وأنا ماعليها لو حصل بي سو=ما تدري فعلها ينزع عزيز القلب بعروقه
تواعدني تقول:الحلو قادم والزمن يحلو=أصدقها لكن أفعالها ماهي بمسبوقه
تشاغلني وتشغلني وتقهرني بقيلت هو=أموت من القهرلامن شعرت الروح مسروقه
أخايلها سحايب مقفيه لو كان فيها نو=على دارٍ(ن)بعيده خيرها لا ناضت بروقه
متى غيثك يباشر دارنا من ساحلٍ(ن)لعلو=تعيش أغصان يبس والزهر يفوح بعبوقه
أماني والأماني عايشة مابين ليت ولو=مثل منهو يحقن الماء بقربة شن مشقوقه
أنا وأنتي خلوجٍ(ن)صبروها فالولد بالبو=يهدي روعها لا صارت من الحب مطفوقه
بغيت أخاوي الكادي نغير كلنا للجو=وخفت أزيدها خنقه وهي من قبل مخنوقه