أسعد الله أوقاتكم
اليكم الأبيات علها تروق لكم
لا تشتكي من صد يابايع الصد=جربه تعرف ويش سويت بالناس
خل الكبر والغطرسة فيك تنهد=ذوق الشراب المر وإشرب من الكأس
اليوم أنا بسقيك مدٍ(ن)بلا عد=حتى تدور من مواجعك الأنفاس
ولى زمان اللعب والحاضر الجد=ومن لايدوس الخصم لابد ينداس
ومن لا يعرف اللعب ويصد ويرد=لا ينزل الميدان ويدق الأجراس
ماهو فعلته جايك اليوم مرتد=النار ما تشتب من غير مقباس
أعطيت لك إنذار باقي لك البند=وتطلع من اللعبة بخيبات الإفلاس
تومي بك الأمواج بالجزر والمد=ومن لا يعوم البحر لا يقول:غطاس
هذا جزا فعلتك يا ناعم الخد=طول العمر تقضيه ندمان محتاس
من شأن تأخذ درس وتذوق للهد=من فعلة اللي دايمٍ(ن)رافع الراس
ياما كويت لكبد وأشفيت من كبد=أشلع مثل ما يشلع الحر قرناس
واللي يجيني بطيب يبشر له بسعد=يأخذ وفا ماله حدودٍ(ن)ولا قياس
هذي بدايات الردد والثقل جد=ليا شبت النيران في روس الأطعاس
ليا خيلت وإنهار من سيلها السد=وجتك الهدايا مرسله فوق الأفراس
السيف في حده من المهزلة حد=والكيف يقعد راس من يشكي عماس
رسالتي للي تطاول على الأُسد=ما يدري إن كليب ذابحه جساس
ما ينفع التسويف من بعد في بعد=الى متى تضرب على أخماس بأسداس
نصيحه إرحل قبل لا يشرق الغد=والا تجهز للكتايف بالأمراس