شروطه أعقد من شروط الوزيري = اللي على كرسي يلف ويدوري
قدام عينه ورد فل(ن) وجوري = ونهاية المشوار كبري ودوار
أول شروطه أسمعه ويش ماقال = ماهمني لو قالوا الناس محتال
أمشي معه نقطع كثيرات الاميال = تاره على يمناه تاره على ايسار
ثاني شروطه أتبعه وين ما راح = أتبع سحايب ماطره كل ما لاح
أسايره لو سبب بقلبي جراح = الطير مقصوص الجناحين ما طار
ثالث شروطه أعشق القال والقيل = أحصد على شانه جميع المحاصيل
ايقول خلك ذيب مسراك بالليل = قلت الشجر تزينه حلو الازهار
رابع شروطه اسهر الليل كله = اكون أنا شمسه وظله وخله
ماني بلا خله ولاني بظله = مادام طبعه شين خائن وغدار
شروطه اكثر من حروف الدواوين = يجري سواة الدم وسط الشرايين
من جورها ذبلت ورود البساتين = يبست غصون النبت من قل الامطار
أخر شروطه اطرد الام والاب = على الثنينه يطلب أقسي القلب
الله يخزي من يماشيه بالدرب = شيطان والشيطان مخلوق من نار
قلت اسمع أقوالي مثل ماسمعتك = اترك شروطك خافيه جوف بيتك
ليا رآيتك في طريقي رميتك = ارميك رميه سهمها سهم الاذكار
أنته تعديت الخطوط العريضه = تبغاني أنسى سنتي والفريضه
من طاوعك لاشك روحه مريضه = ينسى حقوق الاهل والنفس والجار
أتعوذ الرحمان من كل شيطان = ما يطرد الشيطان ياكود رحمان
رب البريه خالق الانس والجان = عالم بخلقه وبيده كل الاعمار
رجواك يالمعبود ياخالق الكون = تبعد عن فوادي من كان ملعون
طالبك ياللي بأمره الكاف والنون = إنك تبعد عننا لفحت النار