الشرع فوق الطفل ما يقيم الحدود=خصٍ(ن)ليا كانت لعوب وهذاري
من شائبٍ(ن)رمى على النار بارود=يبي يسوي بالغرام إنتحاري
زايد بعد يا أصحابنا ما غدا عود=وده يصيد مع الصقوري الحباري
وده يعود لقبل لكن ما يعود=اللي مضى من عمر يوم المساري
وده ليا هبت على روحه النود=يصير سبعٍ(ن)مثل ما كان ضاري
يلعب مع التلعات والحبل ممدود=يرقص لهن بسيوف وإلا شباري
طفلٍ(ن)يبي يلعب ولو حوله قعود=وليا غفل وال البني إستداري
يسبل العينين ويقز الإنهود=يداعب شفاهٍ(ن)غشاها الحماري
وأنا أعتقد ماهو على اللعب محدود=لكن باقي بالقلوب الخضاري
صدره من اللي شافت العين ملهود=والكبد فيها من القديم إنكساري
ناوي يسج الرجل والدرب مسدود=والليل مظلم من يشوف بغداري؟
سحاب مقفي لو لمع برق ورعود=ماهو بمروي يابسات الصحاري
لا تشرب الا عد ماهو بمارود=ترى الشراب الهمج يخر صفاري
وإن مت يا زايد ترى اللحد ملحود=هذا قرار الموت ماهو قراري
ما به أتاري داخله داخله دود=وأُما لجنة خُلد والا لناري