أسعدكم الله دنيا وأخرة
اليكم ما جادت به القريحة من خزعبلات علها تروق لكم
الأبيــــــــــــــات
من نهار الربوع ليا نهار الربوع=كل ما رن جوالي تذكرتها
كنها عام والمدة مشلا سبوع=هدت الحيل يوم إني تصبرتها
ينزف القلب دم وبالمحاجر دموع=والمشاعر بعد فرحات كدرتها
أتجزع وأنا اللي كنت ماني جزوع=والقصائد لنزف القلب سخرتها
من سبايب وليفٍِ(ن)للمواصل قطوع=ليتني بالعذارى ماتخيرتها
ودي أشعل لها كل الأصابع شموع=لو تطعن فؤادي عَمْد مررتها
حشمةٍ(ن)للغرام وحشمةٍ(ن)للفروع=لو تسقيني المسموم عذرتها
ياجميل المحاسن ياغريب الطبوع=لا يهمك فعولٍ(ن)لي دبرتها
كان ترتاح من لوعي تجمل ولوع=لا تفكر بروحي بعد دمرتها
جرب الهجر والتجريح من كل نوع=بعد كل المشاعر فيً بعثرتها
لين ترضي غرورك بالخطأ والسنوع=ماتغير حلومٍ(ن)فيً فجرتها
ماتغير لحبٍ(ن)تحت عوج الضلوع=لو الأبواب بالهجران سكرتها
المحبة من الله ماتجي بالبيوع=لو تجي بالبيوع الناس خسًرتها
والله إني ماأعود خلف صعب الرجوع=خلني أحترق في نار سعرتها
مستحيل أترجى وأنثني لك خضوع=ذبح قلبي يهون ولو تكابرتها
سو ماهو بدالك لا ترجى ركوع=ماني اللي يذل ولو تصورتها
لا توقع نزولي سهل بعد الطلوع=لو تطال الثريا كان جاورتها
الشرف والكرامة بالأصل والفروع=من قديم الليالي كم تدبرتها!
ماني اللي يساوم فوقها والقنوع=يعز نفسه حقيقة ما تصاغرتها
من نهار الربوع ليا نهار الربوع=كل ما رن جوالي تذكرتها