أسعدكم الله دنيا وأخرة
من تخاريفي لهذا المساء
هذه الأبيات على عجل مثل ما قيل حل واجب
علها وعساها تروق لكم
على ضفة مشاعرنا زرعنا حلمنا الوردي=تعاهدنا على سقياه من فيض الوفا والشوق
كتبنا بيننا ميثاق ما نخلف أبد عهدي=ودارة دورة الأيام لا لاحق ولا ملحوق
تقافت بإتجاه معاكسٍ(ن)للحاضر النكدي=بعد مافرقت ما بيننا ياساحر المنطوق
أعاني من مرار الصبر وأشكي نايد البعدي=أشيل أوجاعي بصدري أحسه فوقها مطبوق
على ماقيل من هم المواجع واصلٍ(ن)حدي=لا والله فوق هذا صرت كني بالجمر محروق
ليا مني ذكرت أحباب مدري حالهم بعدي=يسر الحال وإلا حالهم من حالنا مسروق
يزيد الضغط بعروق الجسد والحيل ينهدي=هواجيسي تلاعب بي ودمي ما قوته عروق
على الله ينفرج هم القلوب البيض ويعدي=لعل الجرح يبرا والفكر بعد عناه يروق
نهايتها ألا ياوجد حال حيل يا وجدي=أرددها مع الطاروق وأنطقها بلا طاروق
ياشين الحظ لا منه غدا بلحيل متردي=أحسب إني أسوقه مادريت إني معه مسيوق
حظوظ مقسمة ماهي بلا قوة ولا جهدي=قدرنا منكتب باللوح وأمره نازلٍ(ن)من فوق
على ضفة مشاعرنا دفنا حلمنا الوردي=ليا جفت ينابيع الوصل يبقا الوفا والشوق