أسعدكم الله
للتواصل بدون فاصل
بعيدا عن السياسة الى شعر الوناسة
اليكم هالأبيات علها تروق لكم
تقول:أعشقك وأهواك وأعيش مع ذكراك=تقوله:وهي ماجالها مثل ما جاني
الا يا وليفٍ(ن)زادني لوعةٍ(ن)مشكاك=بكت لك لحون الشعر والشعر بكاني
أنا اللي غديت من الوله مثل عود الراك=أعاني جروح فراقكِ(ي)بين جنحاني
يقولون:بالأمثال غادي كما المسواك=نشف من عنا وقته بعد كان رياني
أنا لا ذكرتك صابني بالكلام إرباك=تسابق هماليل السحايب من أعياني
حداني زمانٍ(ن)دون وصلي غدا يحداك=رفيقي بعد غيبتك منظومة الحاني
أجمل بك الحاني ليا هزها طرياك=عليها ومنها تنزف جروح وأشجاني
عسى كل غالي يا غلا دنيتي يفداك=ويفدونك الأحباب ناسي وخلاني
تصبر وأنا بصبر فدا روحي لعيناك=ويفداك قلبي يا بعد بهجة أزماني
لعل الظروف تزين وتزيل همٍ(ن)جاك=تليم لشملٍ(ن)فرقه بعد الأوطاني
أنا ياغرام الروح ماعشت ما بنساك=وكلي يقين إنك محالٍ(ن)بتنساني
تعيشين في ذكراي وأعيش مع ذكراك=ترى كل ماهو جاك يافاتني جاني