أسعدكم الله بكل خير أين ما كنتم
كالعادة بدون مقدمات اليكم الأبيات
ياليل سامرني بعد ناموا الناس=وانا عيوني طاردة زاير النوم
كل مابعد هوجاس قربت هوجاس=تلعب بي الأفكار في جد وحلوم
أحيان فيها عزم وأحيان في ياس=أسج خيل الفكر والخيل ملجوم
ماكني إلا واحدٍ(ن)معه وسواس=يصفق لكف بكف والصدر مهموم
لا من ذكرت لصاحبٍ(ن)عذب الأنفاس=أقفت به الأيام والرزق مقسوم
بين الجواهر يشبه لنادر الماس=وبين الكواكب بدر والباقي انجوم
لا من ذكرته صافي الفكر ينحاس=ودي بعلمٍ(ن)عنه لو عندي علوم
هواه يقدح داخلي مثل الأقباس=يجتاحني عاصف من الشوق محموم
أون وعروق الهوى فيً يباس=من حر مابي عقب فرقاه مكلوم
يا مشغلٍ(ن)للقلب حطمت قرناس=ما عاد بي يامشغلي جهد وعزوم
شربت سم البُعد ياشينها كاس=وياشين مشروبٍ(ن)ليا صار مسموم
أوجاعها بالقلب ماعاد تنقاس=ينهد بيت االروح لا صار ملغوم
الليل كله أضرب أخماس بأسداس=كل ما بنيت لهاجسٍ(ن)طاح مهدوم
بيبان وصله دونها صار حراس=واللي من أول يمكن اليوم معدوم
ياليل سامرني بعد ناموا الناس=وانا عيوني طاردة زاير النوم