أسعدكم الله بكل زمان ومكان
اليكم ما جاد به الخاطر عله يروق لكم او للبعض منكم
الأبيات
يابلسم الجرح مدري منبع أوجاعي=من بين كل العذارى قلبي اختارك
قلبي لعينك وربي جاك منصاعي=مثل الفراشة هوى يازين في نارك
قلبٍ(ن)تولع بحبك غير أطباعي=ماعاد لي هم غيرك شنهي أخبارك
لأجلك ترى بعت غالي صعب ينباعي=وأعطيتك العهد مني لأحفظ أسرارك
جفيت لأجلك محب وبعت لأشياعي=باللحظة اللي كبر بالقلب مقدارك
لكن ماعاد أحس تهمك أوضاعي=ماني بداري عن اللي غير أفكارك
من عقب حبك سكن في داخل أضلاعي=تغير الحال شنو بدل أطوارك
مرتاح قلبك وأنا في راسي صداعي=من كثر ما الفكر فيني يطري أذكارك
قلبٍ(ن)تعلق بحبك يالغلا ضاعي=معازف الشوق جوفه تعزف أوتارك
متساويه بالعنا صيفي ومرباعي=من عقب قل التواصل مبعدة دارك
اليوم اشوف الليالي تطوي شراعي=وانتي بعد رايحة في عالم أسفارك
إن رحت يا بنت والله صعب مرجاعي=صعبٍ(ن)بكل الظروف أصدق أعذارك
ماهو بكل الحوال أكون مطواعي=لا قل غيث المواصل جفت أنهارك
لا صار ما أنتي لحس العاشق تراعي=سدي لباب الرجا وإعلي له أسوارك
خليه يفهم حلومه مالها داعي=عديه واحد من ضيوفك وزوارك
خلي حلومه تموت وما لها ناعي=دام الهوى في فؤادك معلن إعسارك
الرزق عند الكريم أبوابه وساعي=الواحد اللي عليم لكامل أقدارك
كلٍ(ن)تكفل برزقه ناس وسباعي=يعلم بسر القلوب وخطو مسيارك