أسعد الله أوقاتكم بكل خير
هذه القصيدة لها كم يوم ونسيت أنزلها حال من دونها قصائد جديدة
علها تروق لكم
ربع ليال أشريك يا هم وأبيع=ما جبت مكسب والخسائر جسيمه
البال ضائق والمشاعر مواجيع=من خوف مقبلة الليال الوخيمه
خائف يضيع الحلم من عقبه أضيع=ترجع على قلبي مواجع قديمه
الحال قام يشين بالقلب ترويع=والروح من همٍ(ن)غزاها سقيمه
كن الخناجر تقطع القلب تقطيع=قدمه حبي للخناجر وليمه
بعد رفع لي كرت الإنذار تفزيع=يمزح معي مدري بنية سليمه
هدم بفكري من هجوسي مشاريع=ماكنه إلا شب نار بهشيمه
عقب الوفا جرعني المر تجريع=جريمةٍ(ن)يا شينها من جريمه
بعد غرامه ركع القلب تركيع=ما عاد لي على فراقه عزيمه
يأمر وينهي فيَّ وأجي له مطيع=أشوف حكمه عدل لو هو ظليمه
يحكم عليَّ بدون عرفٍ(ن)وتشريع=وشلون يُقبل حكم خصم بخصيمه
رفض دفاعي في جميع المواضيع=ما قدرك روحٍ(ن)بحبه مهيمه
ماكني إلا صفر من دون تربيع=ما عاد لي بحساب دنياه قيمه
ياليتني أقدر وأودعه توديع=لكن صعيب القلب ينسى نديمه
ياصبر وينك وسع الصدر توسيع=مخاوفي دايم بصدري مقيمه
شمع لباب القلب ياصبر تشميع=لا عاد تترك للمخاوف خريمه
كافي زمانٍ(ن)طبع القلب تطبيع=عدة سنين يجر ذيل الهزيمه
الجرح ينزف مانفع فيه ترقيع=أحلام ما جابت لنا من غنيمه
طول الزمان من المحبة ملاويع=حرام نظلم للنفوس الحشيمه
أحلامنا بتموت من دون تشييع=وظروفنا صلفه ولا هي رحيمه
أربع ليال أشريك يا هم وأبيع=ما جبت مكسب والخسائر جسيمه