أسعدكم الله
الليلة اتجاه الشعر مختلف
أبيات على السريع علها تروق لكم
دندن الهاجس وقرب للبعيد=الشواهد يازمن غير الحلوم
الشقي ما ينحسب مثل السعيد=الرخوم من البشر غير القروم
هب يا وقتٍ(ن)مزين للعبيد=استشاخوا فيه خبلان ورخوم
يا خسارة من بغا من عبد فيد=يا ندامة من تعاطى للسموم
شيَّخ الخبلان مخزون الرصيد=العقول خفاف في كل العلوم
احد جاه المال من عمرٍ(ن)وزيد=واحد جاه المال من مال محروم
الجسموس جداد والملبس جديد=الهروج سمان ما تقضي لزوم
ما أنت لاقي عندهم رايٍ(ن)سديد=لا يغرونك بسكبات الهدوم
بالسعة وراث للمجد التليد=بالمواقف يختفوا سواة بوم
مثل صابون اليدين بيوم عيد=ما يدانوا لا دفاع ولا هجوم
في نهار الحرب تلقاهم شريد=الشجيع يطيح طيحة ما يقوم
الذراع يخور لو إنه جهيد=السيوف تكل مافيها ثلوم
ما تشب النار في كومة جليد=والمغادر متجه عكس القدوم
البلادة ما تفارق للبليد=والمذلة ما ترافق للعزوم
دندن المعنى وغنيت النشيد=إنطلق كنه مناديب السهوم
دندن الهاجس وقرب للبعيد=الشواهد يازمن غير الحلوم