قدوم المساء يذكرني بكل مساء
مساكم الله بالخير
هذه القصيدة نسجت خيوطها الليلة الماضية
وهذا المساء موعد خروجها لتباشر ليلكم من أوله
الأبيــــــــــــــــــــــــات
يابعيد الديار ويا قريب الموده=ليت موطنك يقرب مثل روحك لروحي
غائب عن عيوني والمشاعر توده=والهوى بارقه بالفكر نوضه يلوحي
قلبي اللي نهبته يا أريش العين رده=لا تزود على قلبي دخيلك جروحي
مد لي حبل وصلك يا أريش العين مده=لا تكون الحبيب اللي بوصله شحوحي
قلبي اللي سكنته بالهجر لا تهده=دام حبك عطوره بالحنايا تفوحي
احضن الشوق لا تاقف مع الريح ضده=قبل عمري وعمرك يا حبيبي يروحي
هات كفك وحطه تحت راسي مخده=وأخذ مني مطاليبك بجد ومزوحي
لا تقول الزمان صعيب ماني بقده=مد كفك لكفي فيه سري وبوحي
خلنا ناقف بوجه الزمان ونصده=ثم نعلن على وجه الليال الفروحي
لين نطفي لنار الشوق لا بعث جده=في قلوبٍ(ن)تعنت من دميٍ(ن)تفوحي
الهوى كم سنة حبله علينا يشده=والزمن لا تطاول بالبعايد ذبوحي
طال صبري وصبرك بالثواني نعده=والمشاعر ببيت الروح كلمى تنوحي
باب صدك وخوفك ياهوى الباب سده=اشرع لباب وصلك كان تبصر وتوحي
يابعيد الديار ويا قريب الموده=ليت موطنك يقرب مثل روحك لروحي