مساكم ورد وفل وكادي
جبت لكم هالأبيات عساها تلاقي استحسانكم
الجود من الموجود
خلاص أنا عذرت من باق الأيام=ما عاد لي في باق الأيام رادة
يكفيني اللي نلت من عدة أعوام=شبعت منها من هموم وسعادة
الي وليفٍ(ن)واحدٍ(ن)تاج و وسام=على العذارى مستحل الريادة
ما أبدله حتى بتصوير الأحلام=ملك فؤادي وإستلم للقيادة
أعذب على روحي من هبوب الأنسام=متقاسمٍ(ن)للقلب وأيا العبادة
هواه يركض بالشرايين ما أنام=يا كيف أنام وطيف خلي وسادة!؟
مقدر أنام بدون ما أسمع للأنغام=من صوته اللي صار للنوم عادة
وإن ما سمعته نشن الهم بساهام=على الفؤاد وصاب فكري بلادة
أقضي بقايا الليل بمطارد أوهام=جمر الهوى خلى ضلوعي رمادة
ونات صدري كنها صوت الألغام=ولسان شوقي ما نطق للشهادة
الوجد ينهش بالحشا نهش ضرغام=متعلقه بالصدر مثل القلادة
يا صاحبي قلبي غدا بعدك أقسام=عينه لحالي مثل عين الجرادة
بين الرجا واليأس خلفي وقدام=الفرح ينقص والمواجع زيادة
خلاص أنا عذرت من باق الأيام=ما عاد لي في باق الأيام رادة