أسعدكم الله
قصيدة من مجموعة قصائد لم يحالفها الحظ بتنزيلها بوقتها
علها تروق لكم
الهنوف اللي قضيت الليل معها بالسوالف=الله الله من عذوبة حكيها ليلة سمرنا
ليلةٍ(ن)ما مثلها بالعمر من حسن الطرايف=شق نور الفجر مر الليل كله ما شعرنا
يا حسين الدل يا عذب اللما حلو الشفايف=السوالف من شفاهك جابت لقاصي خبرنا
حركت بالقلب مكنون التوجد والحسايف=لين طار النوم وعيون الهوى عشقت سهرنا
المشاعر تدهج بالصدر والخفاق خايف=خايف يجدد جروحٍ(ن)ما يشاهدها نظرنا
المواجع كايدة صعبٍ(ن)تغطيها اللفايف=صعب نكشفها لخلق الله بعد ربي سترنا
الطبيب اللي يداويها هجر للطب عايف=العلاج صعيب وقلوب الشقا لقيت قدرنا
الله اللي جمَّع وفرق شمل منهم ولايف=لو بغينا نجمع لشملٍ(ن)تفرق ما قدرنا
كيف نرضى بعد كل الحب بأرباع النصايف=لو رضينا كل حلوٍ(ن)فات بالماضي دمرنا
الحلول كثار لكن خيرها بالعين شايف=عقب ما كنا غناوية من الحب إفتقرنا
مستحيل القا مثل ما راح صار الحظ طايف=والبدايل يا رفيع الذوق زادت في كدرنا
السنين الطيبة ولت وحلن العجايف=حكمة الله لو نعارضها بمقسومه كفرنا
ما كتب ربي رضا لوكان للرغبة مخالف=الله القادر يعوضنا ليا منا شكرنا
يمكن تزين الظروف وهمنا يطلع خفايف=الله إنه لا يضيع صبرنا لا من صبرنا
الزمان يدور وأيام العنا تذهب خسايف=الله بلطفه ليا من راد بإحسانه غمرنا
عل يرجع صاحبٍ(ن)مفقود ويفك الكتايف=عن مشاعر عقب راح بدون مانشعر قبرنا
أنتظر جيته لو طول العمر بقضيه واقف=وإن تباطى في رجوعه مثل ما قالوا:جبرنا
صاحبي مالي غناةٍ(ن)عنه يا حلو الوصايف=مثل ما ليل السهر ماله غناةٍ(ن)عن قمرنا
يالهنوف اللي قضيت الليل معكِ(ي)بالسوالف=الله الله من عذوبة حكي في ليلة سمرنا