أسعدكم الله
الأبيات بدون مقدمات
سما نجد يا زينه ليا ناض به برق=تحرك هواجيسي بروق السحايب
تهيضت وأنا متجه يمه بطرق=من الهاجس اللي ما يحب النشايب
طريقي من المغرب وأبي وجهة الشرق=نشوف الديار ونلتقي بالحبايب
هوا ديرة الأحباب عن غيرها فرق=هواها يرد الروح والبال طايب
ربيع النعيرية سرق خافقي سرق=وريح الخزامى مع نسيس الهبايب
يداوي قلوب(ن)دمها منحرق حرق=من الشوق جاله بالمحاني شبايب
من الوجد جاوب خافقي نايح الورق=سجينٍ(ن)ورا عوجِ(ن)لنبضه رقايب
أماني زماني والقهر تزرقه زرق=من أول شبابي لين ذا الحين شايب
عن الواجب الغصاب ما لوذ في درق=جبل ما تهزه كايدات النوايب
سما نجد يا زينه ليا ناض به برق=تحرك هواجيسي بروق السحايب