أسعدكم الله
الأبيات كالعادة بدون مقدمات
قضيت ليلي مراقب عقرب الساعه=أعد لفاتها وأحصي دقايقها
كله على شأن منهو قال مرجاعه=في ساعةٍ(ن)بينه حدد مناطقها
أسهرت عيني وقلبي فيه فزاعه=خائف يغير وعوده ما يحققها
واللي توقعت صار وصابني لاعه=أكذب لساعتي وإلا بصدقها
فات الوعد والقمر ما بان مطلاعه=والنفس تشتب بأعماقي حرايقها
ما كنت أظن الوفي بيغير أطباعه=يخلف مواعيد بعهوده موثقها
لكن بشره على قلبي ليا طاعه=وانساق خلف الحلوم ولا يسابقها
اللي يحسبه حبيبه للعنا باعه=خلاه في موج لوعاته يصافقها
على بحر حسرتي فارد لي شراعه=وأحلام ذيك السنين أقفت زوارقها
قلب الشقا غدر وقته بخر أطماعه=طارت عصافير سعده قبل يطلقها
ما باقي إلا طيوف تجدد أوجاعه=لا هي تفارق ولا نبضه يفارقها
ما بين عقلي وقلبي حاصل انزاعه=العقل يرمي بها والقلب يلحقها
مكاسبي من جهود العمر فقاعه=في عصمة القلب ومعيي يطلقها
ياحسرة الروح صار الحظ شماعه=كل الخساير على حظي معلقها
قضيت كل السنين مراقب الساعه=أعد لفاتها وأحصي دقايقها