الأبيات
علها روق لكم
ما عاد أنا وإياك لو كان ودي=البعد وظروف الزمان تحداني
في ما مضى بذلت للوصل جهدي=مير التجاهل والتناسي كواني
ذليت نفسي بالرجا والتجدي=شكيت لك حالي بسر وبياني
أبيك ترحمني ويمي تلدي=نسيت حالي يوم حبك عماني
ركضت خلفك ركض منهو يودي=لين الزمن مما جرى لي بكاني
غسلت من حلم التلاقي ليدي=كافي من أوجاع الزمن شيء جاني
اللي جنيته من مواجيع سدي=توبة عن أحلام الهوى يا زماني
ما نلت منها غير تفطير كبدي=أتبع سحابٍ(ن)مقفيٍ(ن)ما سقاني
وجدي على عمرٍ(ن)مضى والف وجدي=ما عاد لي سواه من عمر ثاني
روح هبا واللي مضى ما يردي=ما بين ليت وليت وقتي طواني
واللي بقا ما يحتمل للتحدي=خسرت عمري ما كسبت الرهاني
اللي بنيته قدم عيني يهدي=ما عاد ينفع حكي ما كان كاني