الأبيات بدون مقدمات
.....
يا شيب عيني من هجوسٍ(ن)تجيني
والسر ما بين الهواجس وبيني
طير لحلو النوم ما طب عيني=كل ما تقافت زفرةٍ(ن)جات زفره
الصدر كنه فوق الأنفاس مطبوق
أحسني من ضيق الأنفاس مخنوق
دمي غدا من شدة الهم محروق=والكبد فيها من عنا الوقت جمره
أون وضلوعي كمايه تعاوى
عليك ياللي دونك الحظ لاوى
متى فؤادي من عنايه يتشاوي=ترجع وتكفيني شرور المضره
مشتاق لك شوق الصغار اليتامى
يا مشغلي بالصحو مثل الحلاما
عليك من قلب المولع سلاما=حرٍ(ن)يهادي بالتحايا لحره
ليلي بدونك يقطع الحيل طوله
الصبح يا بعده ولاني بحوله
والشوق فيني جامحاتٍ(ن)خيوله=كل ما تلاشت كرةٍ(ن)جات كره
أساهر أطيافك وأهرج لروحي
هواجسي ما بين جد ومزوحي
الشوق شايب بالحنايا ينوحي=ما عاد يحلاله من اليأس سهره
اواه يا حالي وياشين حالي
يا شين ليلي في زماني لحالي
ما عاد باقي بالعمر شيء حالي=ما باقي إلا ونةٍ(ن)ثم عبره
تسقي هدب عيني بدمعٍ(ن)تحدر
كل ما ذكرت لماضي الوقت بدر
هذا مقدر من يرد المقدر؟=لا بد نأخذ من شقا الوقت خبره
حلو العمر ولى وقفت سنينه
الشيء يا حلوه ليا حل حينه
لكن بهذا الليل ويني و وينه=حل الزمن دونه وزوده ندره
يا شيب عيني من هجوسٍ(ن)تجيني
والسر ما بين الهواجس وبيني
طير لحلو النوم ما طب عيني=كل ما تقافت زفرةٍ(ن)جات زفره