بدون مقدمات
الليلة الهاجس يحلق بالأفاق=يتبعه طاروقي وعيني تلـدا
صوب الوليف اللي له القلب يشتاق=من بد كل البيض عندي مبدى
روح وخلاني فريسة للأشواق=شوق يتعاشاني وشوق يتغدى
ودي بشوفه مير يا حظ ما لاق=أحرم عيوني شوفتي للمفدى
هواه ساكن بالمشاعر والأحداق=لولاه غالي كان بروق وأهدى
مير الغلا زايد وهبنيه خلاق=عمري فداه وليت عمري يسـدا
اسهر على شأنه ليا وقت الإشراق=طولي السهر حيلي من العام هدا
مر السهر نشف طريات الأرياق=ما عدت قاوي ياغلا عنك بعدا
في داخلي بركان والشوق حراق=مكسور قلبي بين جزرٍ(ن)ومدا
حمل البعاد المر ماهو بينطاق=لكن يا عزاه بالقلب شِدا
أون ون اللي من الطعن منعاق=الصدر ضايق والليالي تحدى
أخذت وليف الروح والوقت بواق=أقفى ودمع العين مغرق لخدا
ماني ولا خلي نبي بعد وفراق=لكن زماني فوق الإفراق حدا
لا عدت يا وقتٍ(ن)للأحلام سراق=ضاع العمر ما بين جايب و ودا
الوقت لو جرب غرامٍ(ن)بالأعماق=في ذمتي ما كان مر وتعدى
لكن ما يعرفه يا كود من ذاق=اللي غرامه جوف الأعماق صدا
عدة سنين بسكرة العشق ما فاق=يعد دقات المعاليق عدا
ما بين هم وغم وأشواق بسباق=يقضي حياته لين حاله تردى
ما باقي إلا لفة الساق بالساق=يارب لطفك في قضا ما يردا
الليلة الهاجس يحلق بالأفاق=يتبعه طاروقي وعيني تلدا