الليلة الهاجس كما الألغام=الليل كله بالعنا سـاهر
ضاع الكلام وجفت الأقلام=قاف القصائد للهوى ناكر
مات القصيد وتاهت الأحلام=اللي من أول تبهج الخاطر
ما عاد ياتيني جديد الهام=من حين غاب محرك الشاعر
صارت سوى بعيوني الأيام=مافيه شيء يسر للناظر
حلو الليالي راح قبل العام=واللي بقي يارب يا ساتر
أثقل على قلبي من الأوهام=اللي تصبحني من الباكر
والليل تسهر بالفكر ما تنام=لين أتعبتني والله الخابر
مالي علاجٍ(ن)يبري الأسقام=إلا رجوع حبيبٍ(ن)سافر
بعده هجوسي مثل طيرٍ(ن)حام=على صحاري ما بها ماطر
الليلة الهاجس كما الألغام=الليل كله بالعنا ساهر