ليت ليل البارحه طال ما جا له صباح=نكمل المشوار ونقول باق السالفه
حين ليلي ابتسم وابتسم سيد الملاح=صابني بالقلب زلزال مدري راجفه
قلبي اللي كان قاسي بضحكة سن ساح=العروق اللي تغذيه شبه الواقفه
نبض قلبي زاد والدم بالخفاق فاح=والمشاعر جات مثل السرايا زاحفه
احسب إن القلب من فرحته بالجوف طاح=والكلام اللي بقوله ما كني عارفه
الكلام اللي بقوله بمي الدل ماح=حين هبت هاجسي من هبوبه عاصفه
يوم ضحكت ضعت ما بين جدي والمزاح=صرت اقول الكلمة اللي تجيني طارفه
ضاعت الليلة وقلبي بشوقه ما استراح=والهنوف المترفة من جنوني خايفه
جئت بداوي جراحي وبعثرت الجراح=بالحلوم الميته والحلوم الزايفه
ليل عدى ما كسبنا من أحلامه صلاح=مرني مسرع وساهر عطاه مخالفه
ما أنتبهت إلا المرحب ينادي للفلاح=قمت من نومي وريقي بحلقي ناشفه
بالنهاية حلم مدري خطأ وإلا مباح=مرني في ليلةٍ(ن)للصباح مشارفه
ليت ليل البارحه طال ما جا له صباح=نكمل المشوار ونقول باق السالفه