يا صاحبي يا شمعة الديرة=أقسم لك بربي وصدقنا
شاعرك شل البعد تفكيره=وايضا ظروف أخرى تطوقنا
لا ترمي الحيرة على الحيره=اطلب عسى ربي يوفقنا
ترى فؤادي زاد تكديره=من شيء بأعماقي مضيقنا
أنا بلايه زايد الغيره=والهاجس اللي ما يروقنا
وأتعب ليا من جبت لي سيره=إن الزمن يمكن يفرقنا
لا ترمي البنزين بالنيره=تقبس علينا ثم تحرقنا
خل الأمور تسير بالخيره=لو الزمن والعمر يسرقنا
حبل الأمل للفكر تخديره=أخير من واقع يمزقنا
البعد ما يحتاج تبريره=فرقاك يا مملوح تشرقنا
عليه بسم الله وتكبيره=انحره كان إنه يلاحقنا
وإن كان ما تقوى لتدبيره=صارت مغاربنا مشارقنا
حكم الله الحاكم وتقديره=وحكم القدر لا شك سابقنا
الوقت له لفة وتدويره=ما تمنعه عنا مطارقنا
لكن تطمن بس تحذيره=من شاعرك ما دمت تعشقنا
عل الفرج في كل تأخيره=يمكن يعز الله بيارقنا
أهواك يا صبحي وتنويره=حبك تمكن من علايقنا
يا صاحبي يا شمعة الديرة=أقسم لك بربي وصدقنا