ليت ذيك السنين الأوله يرجعن=والمشاعر تعود مثل ذيك السنين
من حلاها بعيني مالها من ثمن=لو تقاس بثمن فاقت لما هو ثمين
يوم كنا بشوق وحلمنا بالزمن=نحضن يدين بعض ونهتني باليدين
مير ربي طوى ذيك السنين ومشن=ما بقي غير ذكرى تحرق المغرمين
كل ما جن ليل الطيف بالعين جن=يشغل البال ويطير لمرقاد عين
بين هنة و ونة متعبة للجفن=كل ما هم بالهجعة جذبت الونين
اتقلب على الجنبين كل حزن=العمر راح حلوة يا غرامٍ(ن)دفين
ما لقيت العلاج اللي يداو الغبن=ولا لقيت الكلام اللي يسل الحزين
ليت حلم الزمان الأولي يندفن=مثل ما تدفن الأموات والراحلين
كان حطيت له قلبي فراش وكفن=واتلقى عزاه من أطرف الطارفين
مير حلمي اظنه صايبه مس جن=كل ليلة يمر يسامر الفرقدين
كل ليلة على قلبي وعقلي يزن=والمشاعر بلتني بالعوى والحنين
ليت ذيك السنين الأوله يرجعن=والمشاعر تعود مثل ذيك السنين