معاناة اليتيم



طفل(ن)بنى فوق الثريا له احلام = وارسل طموحه للنجوم وقمرها

رسم على صدر السماء لوحة اوهام = بروازها ضحكه بوجهه اثرها

ونحت على سطح القمر قبل ما نام = بعض الاماني بعد فكرة اسرها

كبرت بذور الحلم مع مر الايام = وكان يتامل يوم يجني ثمرها

جاه الخبر فجاءة وطير القدر حام = اجال مكتوبه بصفحة قدرها

الموت له حروة وله قوس وسهام = سهم المنيه كم جثه قبرها

فقد ابوه وحس في صدره الغام = والعين هلت ماطر(ن)من عبرها

مثل السجين اللي سمع حكم الاعدام = تبخرت احلامه اللي بذرها

واصبح اسير احزان وهموم والام = روحه زجاجه وادنى شي(ن)كسرها

مشاعره تشكي وقلبه غدا حطام = لامرته اطياف ابوه وذكرها

تملت جفونه من الدمعه اكوام = وبين على الخدين مجرى نهرها

عزي لحاله لو بكى كيف ينلام = عوده طري ومصيبته ما قدرها

الله امرنا قال حذراكم يضام = يا ويل من ضام اليتامى وقهرها

لطفك مع الايتام تمحى به اثام = يدفع بلاوي الوقت يمنع خطرها

المصطفى ذاق اليتم قبل الالهام = واصبح يعاني من الحياة وقشرها

واوصى على اليتمان والخير قدام =اللي كفلهم فالاجور ادخرها

في جنة الفردوس مع خير الانام = صحبة نبي الله غالي مهرها

الله يا معظمك يا دين الاسلام = ربا النفوس وبالمعالي امرها

لكل شي(ن) حط دستور ونظام = قران مع سنه في الامه نشرها

شريعة المختارفيها افضل احكام= يا بخت من نفسه لدينه نذرها