ليت هذي تجمل تنهي المشوار=تقطع لعرق قلبي من معاليقه
دامها ما تبا تطفي لهيب النار=موتي أرحم من الحرمان والضيقه
مير مني رسالة تلفت الأنظار=في بيوت القصيد وفي طواريقه
يا هوى البال روحي تطلب المسيار=وأنت بيديك حل الأمر وتعيقه
المطاليب ما تخفاك بالأشعار=شاعرك من غرامه ما بلع ريقه
لا متى ياغرامي بنتظر صبار=طول الأيام يا مضنون ما طيقه
لا تقول إنتظر طال الزمان ودار=جيش الأحلام عنتني بواريقه
حلها لا تشتت باقي الأفكار=لا تفرح عواذل فوقي مويقه
دق في نعش هجران الهوى مسمار=مثل ما هو تريد بدون تلفيقه
حلمي اللي بنيته قبل لا ينهار=أنشدك يا مرامي كيف تحقيقه
وإن توخرت عني حلم عمري طار=والله إنه يعوض في صواديقه
ليت هذي تجمل تنهي المشوار=تقطع لعرق قلبي من معاليقه