جديد الشاعرة:نسمة غلا
بمطلع العام 1429هـ
اسمع كلام الحـره اللـي تـودك=ان كان تبغاها على طول تغليـك
يحق لـك مـادام مافيـه قـدك=تزعل وتتغلى على شان اراضيك
نصيحتي ياشيخ لايطـول صـدك=اعقل تـرا والله لاروّح واخليـك
ايه اعشقك بجنون واحـب يـدك=واحب حتى ارضٍ مشتها مواطيك
لكن ليـا زودتهـا قلـت حـدك=وقف ترى مليت زايـد تجافيـك
لابنت عمٍ لك ولا اعـرق بجـدك=لكن احبك حب من قلب واغليـك
ان كان غيري ياهوى البال سدك=اباطلب الله فـي حياتـك يهنيـك
ابانسحب بشويش لو كـان ودك=مادمت بايعني فلا يمكن اشريـك
ادري بتاليهـا عليّـه مــردك=لابار بـك وقتـك ودارت لياليـك
تندم ليامن يمي الشـوق شـدك=تحتار في امرك وتصفق باياديـك
نذرٍ علـي انـي لصـدك واردك=لني ليا قفيت من قلبـي امحيـك
لو كان دمعك سال من فوق خدك=باقول انا لك حالفه مالتفت فيـك
لكـن خلاصتهـا ترانـي اعـدك=اقرب من الاقراب والروح تفديك
لا لا تقول الحين بيحـت سـدك=توي عرفت اللي خفى من خوافيك
ماقصدي اشقى بين جزرك ومدك=هذا فقـط انـذار ياليـت يكفيـك