أبيات مهداة لشاعر نجد
أنته بدار منشف الجيب تنشيف=وش جبت منها غار شوك النقيعة
إن كان منك خوة اقبل الصيف=نبا نصيف بالديار الشبيعة
ولم معاميلك وزهب لنا الكيف=واحجز لنا بالطائرات السريعة
وأما غزانا الشام وإلا بني سويف=لا تحط من دون اللوازم ذريعة
نبا البكار الشعل اللي معاطيف=اشرب صبوح وكب عنك الشريعة
الشحم فوق ظهورهنه مراديف=وإن طبت الميدان مهي جزيعه
سج البكار وعسف الصعب تعسيف=خل الصعائب في يمينك مطيعه
يا صاحبي خابرك نقال للسيف=وتحب عسف المهرة اللي طليعة
خلك مثل ما كنت والعلم تصريف=لا تعتذر يا كود تشكي وجيعة
ماني بخابركم تحب التناتيف=من هو تقنع بالقليل قطيعة
أخذ سواليف(ن)وهات السواليف=نبا علوم الفكر دائم رفيعه
لاتعتذر ترى الرجولة مواقيف=الرجل يعرف بالليالي المريعه
خلك مثل ما كنت راعي تصاريف=راعي علوم طيبات بديعه
وإلا حداك الوقت يا حيف يا حيف=حطيت راسك جنب رأس المذيعة
اليوم أشوفك مرخي الرأس وتهيف=ماني بخابرها من أول طبيعه
ولى زمانك يا كثير المعاريف=وين العلوم الأولات السنيعه
كنك على مافات مكثر تحاسيف=ضاقت بك الدنيا وكانت وسعه
جاك الجواب وهات ردك على الكيف=قل لي تمام العلم والا قليعه