الأبيات أيها الأخوة والأخوات
بدون مقدمات
قلت:أنت وينك قال:بالبيت موجود=وش ظن بالك وين تبغاني أروح
حكم علي الوقت والوقت مقرود=خروج برا البيت ماهو بمسموح
اللي يروح القلب ياصلك ويعود=يحمل جروح ويرجع بهم وجروح
أنا أدري إنه بيننا حب وعهود=لكن أظنه حب مافيه مصلوح
ياما على شأنك تحملت مجهود=لكن راحت كلها جد ومزوح
كل الذي أفعله بالضبط مرصود=حتى ولو إنه عدل يحسب جنوح
حتى النفس القاه بالكشف مجرود=كني زجاج(ن)ما يخبيه مفضوح
ماهو بكيفي فوقها غصب محدود=حتى ولو إني تظاهرت بفروح
تلقاني أرقص والقهر مالي الفود=أرقص مثل مايرقص الطير مذبوح
أضحك وقلبي فيه ويلات ولهود=تعبت منها بس مقدر على البوح
الذهن دائم فيه سجات وشرود=يموت في صمتي ويبعث مع النوح
أحيان أحس بنار وأحيان ببرود=وأحيان أحس إني جسد خالي الروح
كل شيء في دنياي مربوط بقيود=حظ البشر يركض وأنا الحظ مسدوح
لا عاد تسألني عن النقص والزود=صارت سوا في ناظري قاع وسفوح
ما بيني وبينك غدا الدرب مسدود=قد أيش أنا وإياك بنصارع شبوح
هذا جوابي كان ودك بمردود=أظن واضح ما يحاوج له شروح