الناس مثل ما قيل أجناس
يختلفون باللون والعقل
وهذا منبع فكرة الأبيات
يالله دخيلك من دروب الغوايه=يا رب تجعل كل صعب(ن)ميسر
من لا هداه الله ماله هدايه=كل ما سلك طريق فوقه تعسر
اللي يبي يفرض على الناس رايه=حتى ولو إنه عوج ما يقدر
ترى الوسيلة ما تبرر لغايه=بعض الفعايل يا فتى ما تبرر
والا بعضها كنها بالمرايه=ماهي بحاجة عذر حتى تعذر
إن كان ما تملك علوم ودرايه=والا منحك الله صبر وتصبر
جنب عن اللي يتعبك بالبدايه=خلك حريص ومن زمانك تحذر
لا تنتظر حتى تجيك النهايه=اللي تضيق خاطرك ثم تكدر
الناس ما تتبع هواك وهوايه=كل(ن)ءله في دنيته ما تخير
بعض البشر العند عنده هوايه=طبيعة(ن)متمكنه ما تغير
يصنع من الأوهام أكبر حكايه=لو تتبعه تلقاه ماش وتبخر
لو قلت له خلاص هذا كفايه=صرت العدو اللي بعد ما تصور
أما تجي بكيفه وتمشي برايه=والا غدا عاتي مثل ريح صرصر