مساؤكم/صباحكم
ورد وفل وياسمين
واليكم الأبيــــــــــــــــات
الكلمة اللي حركت حس شاعر=جتني على الجوال ماهي مصده
إشتقت لك كلمة تهز المشاعر=خص(ن)ليا جاتك من اللي توده
من واحد(ن)لا زال للود فاكر=واللي يودك بالمخاليق بده
اللي على شوفته تعط البشاير=ودك برمشة عين اتكون عنده
يا مرسل الكلمة أنا الك شاكر=لو إن قلبي كلمتك ما تسده
أبيك كلك لو دونك مخاطر=حتى ولو عمري على الموت أحده
يا بوك يا حب(ن)على الروح جاير=والبعد والتفكير للحال هده
منها يظلي دمع عينك عباير=يسابق الكفين صعب(ن)ترده
كن الفؤاد من المعايق طاير=لولا الضلوع اللي بصدري تصده
يا أغلى من النون بين المحاجر=وأعذب من الأنسام بهزله وجده
القلب دائم من مودتك عامر=أنت الوحيد اللي سكن فيه وحده
ما كني الا طالب(ن)فيك أذاكر=حافظ كتابك كل نقطة وشده
القاك دائم ماثل(ن)للنواظر=مع كل رمشة عين وبكل لده
منساك لو دارت علي الدواير=يا مالك(ن)روحي بقربه وبعده