بسم الله الرحمن الرحيم

مهداة للأخ الفاضل / صالح الزقدي / أبو نواف صاحب ديوانية رجف القوافي

وهي ليست ( في مجال الغزل العذري) للتوضيح وفقكم الله


ياصالح خذ المؤجز وعطني سديد الشور = لعله يفيد العاشق المغرم اللي طاح

طريح المحبه والهوى من ثلاث شهور = أنا رحت لولا رحمة الواحد الفتاح

أحس إن في صدري لهب حامي التنور = غريق المحبه لاسفينه ولا سباح

أنا كيف أسوي كان قفابه المظهور = عسى الله يصبرني لو إن الغلى ذباح

وأنا شوف حظي تالي الوقت فيه قصور = محاصيل زرع (ن) ماتهنابه الفلاح

تهنابه الديان بالموعد المذكور = جلس يبترم بحدود زرعه تقل مساح

غدت مثل حاله حالتي ضايق(ن) مقهور = أجاوب حمام الورق في عالي الملواح

أنا لو سهرت الليل ياالزقدي معذور = مع ا لحايليه يابونواف قلبي راح

ألا يابعد حيي هكا الزول والديكور = عليه الله أكبر نور خده كما المصباح

وقف قال كيف الحال يالشاعر المشهور = أنا من حمام الدار ماني من السياح

رديت قلت بخير ياالجادل الغندور = عطاني رؤوس أقلام لكن بدون إيضاح

عنود(ن) على صيد الهواوي تجيد الدور = أنا اللي مهولني قتلني بدون سلاح

طغى بالحلاء والعرف واللؤلو المنثور = جرحني وفرحني ذبحني وهو مرتاح

غدرني وكدرني ترك خاطري مكسور = ترك لي غرابيل الدهر والسنين شحاح

خذا الحال في بسمه وحكمه وكبر الجور = وخذا الصبر وعزومي شذى عطره الفضاح

وخذا الحسن بأوصافه يشابه بنات الحور = أنا فدوته لكن سببها تروح أرواح

خذاء اللي خذاء واللي ترك لي يجيه الدور = سقاني ولقاني جهنم وسدي باح

ياصالح لك الله لو يشوفونه الجمهور = مثل شوفتي له يلحقون الصياح صياح

صدوق(ن)بيوق(ن) عاقل(ن)جاهل(ن)مغرور = قريب(ن) صعيب(ن) كايد(ن) ماوراه أرباح

عفيف(ن) لطيف(ن) لاخفيف(ن) ولا مطيور =عطوف(ن)هجوف(ن)لين(ن)قاسي(ن)مزاح

صحيح الهوى قتال من واقع المنظور = يسَـقِـيك من كاسات الأمرار باالمفواح

عسى ملتقى رجف القوافي لقاء دكتور = يداوي جروح(ن) حيّرت مذهب الجراح

والسلام / أخوكم الشاعر/ مبارك طناء مبيريك الشمري