السلام عليكم ورحمة الله وبركاته
الأبيات هذا اليوم......علها تروق لكم
بين الرجا واليأس والجزر والمد=أنته وأنا في ماضيات الليالي
ترخي شوي وترجع تعود وتشد=ودك تعرف بكل ماهو ببالي
ما تدري إني بحر من طب به عُد=مفقود حتى يعود والا يُغالي
يروح محد(ن)عنه بالناس ينشد=قالوه بالأمثال بأول وتالي
داخله مفقود(ن)وخارجه يولد=والفعل يغني عن كثير السؤالي
كثر الحيل بتضيع لا شافت الجد=والواقع يكذب كثير الخيالي
ليا صار حر الصيف ماهو كما البرد=بالعقل نعرفها ولاني مبالي
ما يرتفع بنيان مع معول الهد=ولا ينشرب مر(ن)ولو قيل حالي
والنفس ما ترتاح بالهجر والصد=والهم ما يعرفه مخلوق سالي
ومن لا يحسب قوة القول بالرد=يجيك منطوقه من العقل خالي
ومن لا يودك لا توده ولو لد=حتى لو إنه فاتن(ن)بالجمالي
بعض الجمال أقصاه في لمعة الخد=جمال مثله أيل(ن)للزوالي
من لا يذوق المر ما يعرف الشهد=من لا يبيع رخيص ماجاب غالي
وأخر مطاف أيامنا انزل وعد=دورة فلك مابين واطي وعالي
باب نفك وعشرة أبواب تنسد=مادام حالك متفق معه حالي
من ساعة لقانا ليا ساعة اللحد=عيش العمر والأمر كله لوالي
ببقا أنا وإياك بالجزر والمد=أنته وأنا في مقبلات الليالي